ТУЖИЙН НАРСАНД ОЙЖУУЛАЛТ ХИЙСЭН ЯПОНЫ “GNC” ТББ-ЫН ТУХАЙ ӨГҮҮЛЭХҮЙ
Сэлэнгэ аймгийн Тужийн нарсанд ойжуулалт хийсэн Японы “Жи Эн Си” төрийн бус байгууллагын тухай “Ногоон эрэл” сэтгүүлийн уншигч олонд хүргэж байна. “GNC Japan” буюу Жи Эн Си Жапан нь Японы ашгийн бус байгууллага юм. 1995 оноос хойш мод тарих, ойжуулах, мод үржүүлгийн газар тариалан эрхлэх, жишиг ферм байгуулах, байгаль орчны боловсрол олгох зэрэг олон чиглэлээр Монголд үйл ажиллагаа явуулсаар ирсэн билээ. GNC гэдэг нь Global Network for Coexistence буюу Монголоор бол Хамтаар орших дэлхий нийтийн сүлжээ эсвэл холбоо хэмээн орчуулан хэрэглэдэг. Энэ байгууллагыг үүсгэн байгуулахад гол хувь нэмрээ оруулсан хүмүүс бол Киотогийн Аж Үйлдвэрийн их сургуулийн нийгмийн ухааны профессор Мияги Иппэй болон Япон улсын иргэн Яно Акико нар юм.
Мөн энэхүү байгууллагын Монгол дахь үйл ажиллагааг олон жил удирдан чиглүүлж, хүрээллийг тэлж, байгаль экологийн боловсрол, хамтын ажиллагаа, мод үржүүлэг, ойжуулалтын бүхий л төслүүдийг эхлүүлж, тогтвортой үргэлжлүүлэхэд шийдвэрлэх үүргийг гүйцэтгэсэн хүн бол Жи Эн Си Монголын үүсгэн байгуулагч, тэргүүн Энхболдын Цогтсайхан билээ. Э.Цогтсайхан нь 2024 онд цэл залуугаараа хорвоог орхин одсон ч гэгээн дурсгал нь бидний сэтгэлд үүрд үлдэх болно.
Монголд Э.Цогтсайханы удирдлага чиглүүлэг дор уг байгууллага нь үйл ажиллагааныхаа хүрээнд Сэлэнгэ аймгийн Тужийн нарсанд 2004 оноос хойш жил бүр ойжуулалт хийж ирсэн бөгөөд уг ойжуулалтын үйл ажиллагаанд Сэлэнгэ аймгийн Ой Ан төв, Сэлэнгэ
аймгийн иргэд, хүүхдүүд, Япон улсын Ногоон сан, хувийн хэвшил, хувь хүмүүс хандив өгч, биечлэн оролцсон байдаг. 2004 оноос 2008 оны хооронд нийт 150 га газар 450, 000 гаруй нарсны суулгац суулгасан байдаг. Түүнээс хойш, 2009 онд нийт 55 га газар 146,000 суулгац, 2010 онд 65 га газар 172,500 суулгац, 2011 онд 70 га газар 182,000 суулгац, 2012 онд 65 га газар 175,500 суулгац, 2013 онд 93 га газар 238,232 суулгац, 2015 онд 26 га газар 65,000 суулгац, 2016 онд 20 га газар 50,200 суулгац, 2022 онд 12.8 га газар 32,000 суулгац, 2023 онд 3 га газар 8,040 суулгац суулгаж Монгол Улсын ойн санг хамгаалж, өргөжүүлэхэд бодитой хувь нэмэр оруулсан байдаг.
Жи Эн Си Жапан төрийн бус байгууллагын Яно Акико нь байгаль орчноо хамгаалах, ногоон байгууламжийг нэмэгдүүлэх, хүүхдийн экологийн боловсролд хувьд нэмэр оруулах үүднээс “Зулзган нарсны мөрөөдөл” хэмээх зурагт номыг зохиож Монгол хэлнээ хөрвүүлэн
хэвлүүлсэн байдаг. Энэ номоороо тэрээр мод тарихын ач холбогдлыг Монголын хүүхэд багачуудад уламжлан таниулсаар ирсэн билээ.
Жи Эн Си Жапан болон Жи Эн Си Монгол төрийн бус байгууллагын үйл ажиллагаанд Мияги Иппэй, Яно Акико, Энхболдын Цогтсайхан нар шийдвэрлэх үүргийг гүйцэтгэснээс гадна Жанцангийн Түвшинтөгс, Баярхүүгийн Норжмаа, Равданлхүмбүүгийн Бат-Амгалан,
Дарамбазарын Батзориг, БямбаОчирын Уугандаваа, Д.Сарангэрэл, Цогтсайханы Гарьд, Такахаши Кёоко, Огава Козо болон Анри, Оониши, Монгол Улсын Хөдөлмөрийн баатар Баттөмөрийн Жамсран, Энхбаатарын Насанбаяр нарын хүмүүс сэтгэл зүтгэл гарган оролцож байсныг энд дурдах нь зүйтэй. Сайн үйлс дэлгэрэх болтугай.
Жи Эн Си Монголын тэргүүн асан Б.Насанбилэг
