“Ой ба хүнс” өртөөчилсөн өдөрлөг боллоо
Дэлхийн даяар таван тэрбум гаруй хүн ой болон ойн дагалт баялгийг амьжиргаандаа ашигладаг бөгөөд самар, жимс жимсгэнэ, үр үндэс, навч, мөөг, зөгийн бол зэрэг хүн төрөлхтний хоол хүнсэнд зайлшгүй шаардлагатай хүнс, шим тэжээлийг хангагч баялаг эх үүсвэх болдог.
Олон улсын ойн өдөрт зориулсан “Ой ба хүнс” сэдэвт өртөөчилсөн өдөрлөгийг “Хүн төрөлхтөн, эх дэлхийн тогтвортой байдал” уриан дор ойгоос гаралтай хүнсний бүтээгдэхүүний хэрэглээ, үйлдвэрлэл, хүртээмжийг нэмэгдүүлэх, эмэгтэйчүүдийн үүрэг оролцоог дэмжих зорилгоор “Ой, тогтвортой байдал, эмэгтэйчүүд” холбоо, ЗГХА, Ойн газар, НҮБ-ын ХХАА-н байгууллага, GIZ STREAM төсөлтэй хамтран зохион байгуулсан.
Энэхүү өртөөчилсөн өдөрлөгт Европын холбооноос Монгол Улсад суугаа Онц бөгөөд бүрэн эрхт Элчин сайд, БОУАӨЯ, ЗГХА Ойн газар, “Ой, тогтвортой байдал, эмэгтэйчүүд” холбоо, эрдэм шинжилгээний хүрээлэн, их дээд сургууль болон орон нутгийн эмэгтэйчүүдийн төлөөлөл оролцож байна. Өдөрлөгийн үеэр “Мөөг ба хаг”, “Цай”, “Самар ба үр”, “Жимс, жимсгэнэ”, “Зөгийн бал”, “Эмийн ургамал”, “Үнэртэн, гоо сайхны бүтээгдэхүүн” гэсэн 7 өртөөгөөр оролцогчид зочилж Ойгоос гаралтай бүтээгдэхүүнүүдтэй танилцах юм.
“Ой ба хүнс-Өртөөчилсөн өдөрлөг”-т хөдөө орон нутаг болон хотын 20 гаруй нөхөрлөл ААН бүтээгдэхүүнээрээ оролцож байгаагаас гадна ойн салбарын 80 гаруй эмэгтэйчүүд төлөөлөгчөөр оролцож байна.
“Ой, тогтвортой байдал, эмэгтэйчүүд” холбоо нь Ой болон байгаль орчны салбарын эмэгтэйчүүдийг идэвхжүүлэх, тэднийг чадавхжуулах, хамтын ажиллагаа түншлэлийг сайжруулах, ойн тогтвортой менежментийг хангах, ойн нөөцийн эдийн засгийн ашгийг тэгш хуваарилах, эмэгтэйчүүдийн манлайллыг бий болгох шийдвэр гаргах түвшинд тэдний оролцоог нэмэгдүүлэх зорилготойгоор 2023 онд үүсгэн байгуулаад нэг жил болж байна.
Энэ хугацаанд Дархан-Уул, Архангай, Хөвсгөл, Завхан аймгийн ой модны салбарын эмэгтэйчүүдийг чадавхжуулах, инновацийг хөгжүүлэх чиглэлээр “Ой ба инновац” орон нутгийн сургалт-семинарыг амжилттай зохион байгуулснаас гадна Уур амьсгалын өөрчлөлтийн эсрэг дэлхийн эмэгтэйчүүдийн чуулганд салбар хуралдааныг зохион байгуулсан.
Цаашид хамтын ажиллагааны хүрээнд Зүүн болон Баруун бүсийн аймгуудад ойн салбарын эмэгтэйчүүдийг чадавхжуулах сургалт болон дунд сургуулийн сурагчдад зориулан Европын улс орнуудын сайн туршлагыг танилцуулах арга хэмжээг зохион байгуулахаар төлөвлөөд байна.
